Psalms 75

Maaron pale iŋgabiiz tamtoghon, ve ighur atia padi

Mbouŋ to Asap

Paesiiŋ ila pa ŋgeu to imuuŋ pa mbouŋ: Mbouŋ tonene aliŋa tovene: ‘Uwaghamuni malep.’

1Maaron, yei lolomai poia payom, ve nipait ghom pa poia tiom.
Pasa, moghon moghon yom unepneep ugharau ghei.
Tovenen yei nipapait izam, ve nivovotia uraat gharatooŋadi to ughamgham di.
2Ve Maaron isaav ighaze: “You taug naghur sawa pa naŋgabiiz tamtoghon ve naghur atia padi.
Ve gabizooŋ tiou, pale deŋia moghon.

3Ighaze yoŋgyoog itok taan, ve tamtoghon tisob tisaŋeeŋ,
you pale nakis taan pughu, leso ineep tuŋia.

4Yes to tipapait taudi izadi, you nasaav padi naghaze: ‘Apait taumim iraua!’
Ve nasaav pa ndiran samsamia naghaze: ‘Aparim taumim malep. Tapirimim ineep sine?

5Tovenen apait taumim malep, ve apiyaav saveeŋ velegiiŋ payou malep!’”
6Pasa, tamtoghon to ndag iza, ma tamtoghon to ndag izila, ma tamtoghon to ndug pida paam, tirau tigham tamtoghon eta iza ivot inim tiina ne maau.

7Maaron moghon, to igham tamtoghon izadi tivot tinim tiina.
Pasa, ye to iŋgagabiiz tamtoghon ve ighurghur atia padi.
Tamtoghon pida, ye itatan di. Ve pida, ye ipakur di le izadi tintina. ^a

8Yoova ikis rubruub eez ila nima.
Rubruub tonowen ivon pa vaen ariaŋa. Vaen tonowen, nene mbalmbali toni.
Ndiran samsamia to tineep izi taan, ye pale iliŋ vaen tonowen, ve ipaghun di pani, le tisob tighun suvuni.
Ŋgiira to ineep ila rubruub mbole, pale tighuni paam. ^b
9Eemoghon you navovotia uraat tintina to Yoova irau sawa isob.
Pale namboumbou, ve napapait Maaron to Yakop iza.
10Pasa, ye isaav ighaze: “Ndiran samsamia, you pale napasob tapiridi.
Ve ndiran deŋiadi, you pale napakur di ve napalot di, leso tapiridi ivot inim tiina.”